Мектепте "Бейнеойындар жасөспірімдер үшін қолайлы ойын-сауық па?" тақырыбында қызықты дебаттар өтті.

Іс-шараға қатысқан жоғары сынып оқушылары әртүрлі көзқарастар мен пікірлерін білдірді. "Трансформерлер" командасы бейнеойындардың жасөспірімдердің дамуына оң әсерін атап өтті. Қатысушылар қазіргі замандағы ойындар логикалық ойлау, зейін, реакция және командалық жұмыс сияқты дағдыларды жақсартуға ықпал ететінін айтты. Сонымен қатар, бейнеойындар білім беру элементтерін қамтып, тарих, математика және басқа да ғылымдарды интерактивті түрде үйренуге мүмкіндік беретіні де атап өтілді. Ойындар жасөспірімдерге қауіпсіз демалыс түрін ұсынып, стресс пен шаршауды жеңілдетуге көмектеседі деп айтылды. Ең бастысы – ойын уақытын реттеп, ата-ананың бақылауын қамтамасыз ету қажет. "Сұңқар" командасы бейнеойындарға деген әуестіктің мүмкін болатын теріс салдарына назар аударды. Негізгі дәлелдер ретінде: ойынға тәуелділіктің пайда болу қаупі, физикалық белсенділіктің төмендеуі және тірі қарым-қатынастың азаюы айтылды. Сондай-ақ, кейбір ойындарда зорлық-зомбылық көріністері кездесетіні және олардың жасөспірімдердің психикасына кері әсер етуі мүмкін екені ерекше атап өтілді. Ойындарға артық уақыт бөлу оқу, спортпен шұғылдану немесе басқа пайдалы хоббилерге арналған уақытты азайтуы мүмкін деген мәселе де талқыланды. Дебаттардың қорытындысында екі тарап та сенімді дәлелдер келтірді. Шара достық бәсекелестік пен өзара құрмет жағдайында өтті. Іс-шара қатысушылардың дәлелді пікір айту, сыни ойлау және өз көзқарасын қорғау дағдыларын дамытуға көмектесті.

Жауапты: Мұхамеджанова А. К.